絲絲講場：10億賭局珠姐終贏雷軍
「雷總，珠姐叫你收貨！佢仲問你嗰10億人仔準備好未？」收咩貨？就係珠海格力電器（000651.SZ）正式財報。格力董事長董明珠同小米集團（01810）董事長雷軍，兩人一三年定下公司5年後營業總收入鬥多嘅賭局終於開估，贏嗰個袋走10億人仔！
早排格力電器上年度財報出爐，實現營業總收入1,981億人仔，對比小米三月下旬公布去年全年營收1,749億人仔，好明顯珠姐完美勝出！其實格力三月已發布業績預告，幾乎肯定舊年營收贏小米，但當時雷總唔忿氣話未見到格力嘅正式財報唔算數，咁依家服未先？
鬥多次都會難分難解
但市場對珠姐最終收唔收到10億人仔無咩興趣，反而覺佢哋賭多次仲過癮。之前已經有口痕友問珠姐：「如果嚟多次五年賭局，你有冇信心贏多次？」珠姐即時答：「叫雷總嚟問我。」
嚟多次五年賭局，市場分析兩家公司各有優勢，估計又鬥到難分難解。珠姐未來五年嘅贏面包括格力掌握冷氣機核心科技，仲同好多家電生態鏈商合作，公司又即將私有化。雷總又會贏乜？小米營收更加多元化，業務利潤點都更多。人工智能和物聯網（AIoT）布局、新技術優勢明顯。
計絲絲話，兩個加埋都超過百歲鬥咩吖？不如平心靜氣傾合作互補不足好過啦。
余絲韻