港股四月見完今年高位30,280點後，一直喺三萬邊上落，昨日終於有多少方向，就係跟隨A股跌，恒指跌256點收報29,549點，主板成交975億元。
值得留意的是，港股是在午後跌勢加劇，最低見29,535點後，大戶未有趁機進一步推低指數。睇番恒指牛仔重貨區正正是29,500至29,658點，有啲點到即止味道。
基於「五窮六絕」效應的陰影下，此前好友若加倉，或間接增加大戶推低大市之誘因，故大家不妨睇實牛熊街貨數據，話唔定有啟示。
如果覺得指數惡炒，咁不如轉吼較具值博率的板塊或者個股，例如近期有大行唱好本地地產股，昨日見新鴻基地產（00016）及信和置業（00083）逆市做好。
從基本面睇，地產股利好因素確不少。首先，港股首季由頭升到尾，而本地樓市亦明顯回暖，有利賣樓收入；其次是美國聯儲局對未來息口態度已從鷹轉鴿，港息再上空間唔大，在低息環境持續下，本地地產股自然有一定吸引力。
此外，近期多間大行看好本地樓市前景，好似高盛原本估計香港住宅樓價未來三年每年會下跌5%，但最新預測則上調今年樓價持平，明年及後年則各升3%；美銀美林亦由原來預測今年住宅樓價會跌5至10%，調高至今年升5%。
策略上，近期港股飄忽不定，高追地產股值博率其實只係一般，故建議候低吸納作中線投資為主。
另外，古勝愛股申洲國際（02313）又有起動迹象，昨日逆市升1.4%報103.9元。
公司憑藉業務不受中美貿易戰影響，盈利收入穩健之優勢，雖然其往績市盈率升到29倍的偏高水平，但股價每次落到去100元邊都見支持。既然現階段炒股不炒市，故不妨在100至109元之間炒上落，密食當三番！
古勝