Market Insight：內地放水炒作概念未完

宜留意，互聯互通南向將於本周五及下周一暫停，想假前減磅，呢兩日就要行事。未來兩周，除咗話係四月期結等例牌因素之外，中美貿易談判是否有結果，頗為關鍵。

雖然現時市場上普遍對貿談成果持樂觀態度，但不能否定係，乃美國總統「侵侵」的取態一向無定向風，一個唔鍾意又話繼續邊傾邊徵稅，就唔得佢死！所以唔到正式公布，大家都要保持番幾分風險意識，免得又被呢位超級賭徒過一戙！

兩地金融股夠硬淨

藍籌股中，騰訊（00700）走勢頗為反覆，昨日早段藉有消息指公司擬推出遊戲手機所帶動，高見398.4元，諗住有機會再踢穿400元關，點知尾市反而跌至全日低位388.2元收市，倒跌1.4%，成交55億元，沽壓唔算太大，係咪引人沽，就要做事後孔明。反而，盛傳將與騰訊合作推遊戲手機的雷蛇（01337），卻受惠股王效應，曾高見2.3元，收報2.13元，升幅達一成，惟要提防可能得一日貨仔。

兩地金融股相對硬淨，滙控（00005）、友邦保險（01299）、中國財險（02328）、中國太保（02601）、國壽（02628）及中國太平（00966）皆逆市高收。事緣內地三月份新增貸款及社會融資數據均勝預期，其中三月新增貸款更是十年同期最多，反映國策正全力支持市場流動性合理充裕，為經濟增長給力。

不過，睇番中國平安（02318）、中國太平及太保股價已升抵主要阻力位，須留意短期是否有足夠的成效配合突破，若受阻回落，短炒可以先走一轉，候調整再睇翻兜機會。

今明兩日內地將公布三月份固定資產投資、工業生產及零售銷售數據。基本上，次季內地經濟觸底的機會頗大，只是A股首季表現已一定程度反映相關因素。到底六月A股於國際指數公司的指數系列比例增加之下，屆時A股是更上一層樓定係好消息出貨，待第三季尾先至再交好友表演？反正大家都冇水晶球，能做的是做好風險管理，有備無患。

人行仍有機會降準

六月的事尚遠，回看眼前四月底恒指按月有進帳的機會不低。事關三月底恒指收在29,000點邊，除非外圍有重大不利消息出現，否則未見得會插落去。此外，似乎內地已為外圍有咩大風大浪作好準備，次季人行仍有機會降準，減稅降費亦會為第三季的經濟數據帶來支持。總之，經濟愈差，只會迫使中央出更多招數維穩，放水係咪治標唔治本，暫時唔會有咩人重視，反正繼續有平錢利炒作，先至係重要！

古勝