絲絲講場:順豐市值大蒸發王衛自插

今日絲絲想同大家分享一個故事,係關於自我反省嘅……

話說一七年二月,順豐速運母公司順豐控股(022352.SZ)喺深圳交易所上市,當時風頭一時無兩,之不過,兩年幾後已經今非昔比!先講市值啦,順豐控股高峰期嘅市值成3,246億元人仔,但截至尋日嘅數字,已經得番1,530億元人仔,跌幅超過一半!至於身為董事長嘅王衛,身家更係「慘烈地」蒸發近半。根據《福布斯》雜誌全球富豪榜顯示,王衛身家由262億美元跌至132億美元,排全球富豪榜第110位。

「上市後太看短期了」

點解會咁傷?睇番順豐控股早前發布嘅年報顯示,舊年公司首次出現淨利潤下降。據講,王衛日前喺公司內部通訊工具「豐聲」入面,發表咗一段說話,聽落似係一封畀員工嘅道歉信噃。

王衛係咁講嘅:「有員工說我變了,我在自我反省,也反省了很一段時間,我有了結論,不是我變心了,只是我是上市還沒有適應過來,太看短期了,沒有堅定我對員工和客戶的初心,可能這就是根本原因。」

另外,佢承認自己為咗完善上市公司嘅合規,而作出嘅調整好「差勁」,仲好誠心向員工講句「我對不起大家!」道歉不特止,仲講到明員工嘅幸福先係佢努力嘅方向,強調「今天我在這裏請所有的員工作證,我還是順豐的王衛!還是你的總裁!我會盡力去做!」

哇!絲絲聽到都覺得Sweet,唔怪得之一眾順豐嘅員工咁落力為公司做事。各位老細,由呢件事可以睇到,其實向員工Say Sorry都唔係咁難啫!?

余絲韻