中國昨日公布三月消費物價指數（CPI）按年升2.3%，為去年十月以來高位，符合市場預期。不過，數據就引來投資者憂慮中央未來放水力度或因而減低，滬綜指最終跌51點報3,189點。
本來以為港股衝破三萬點後會有運行，可惜昨日再度失守，恒指下跌280點報29,839點，主板成交1,197億元，似乎30,200點水平阻力甚大。
恒指自去年十月低位升到本周最高位30,222點，期內累升5,682點。然而，今輪升浪主要是由市場氣氛及資金帶動，其實大部分板塊利好消息唔多，炒來炒去都係靠幾個主力板塊所推動。好似昨日咁，如果唔係因為騰訊（00700）再有遊戲獲批，支撐股王一度抽到上400.4元，恒指又點止跌咁少。
當然，話分兩頭，其實騰訊都係近排至重新發力，若以去年高位476.6元計，其實現價仍低17%。相對恒指較去年高位33,484點僅跌10%，其實股王動力唔算好強。策略上，騰訊股價昨日由最多升2.9%，到收市僅升0.6%，400元關得而復失，考慮到港股中線要再上，股王必定係領軍主力，現價高追可免，不妨留意未來在375元邊的低吸機會。
另外，受騰訊帶動下，個別手遊股亦吸引資金押注，好似博雅互動（00434）、雲遊控股（00484）、遊萊互動（02022）均逆市大幅上升，但睇見創夢天地（01119）升幅則收窄至只有0.7%，隻網龍（00777）更倒跌收市。如果後市動力不繼，炒即日鮮又冇止蝕的話，隨時又要損手離場。
睇番近年手遊股炒作其實都好短癮，正如昨日咁，板塊氣氛咁熱亦唔係隻隻升得起，萬一揀錯或者入貨價唔靚，一樣會無錢贏。既然係咁，考慮到已係周五，大市又出現回吐壓力，不如乜都唔好做，等市場出現新方向先再出手，勝算會更高。
古勝