呢幾日天氣真係熱咗好多，各位家庭主婦有無諗過可以安坐家中，涼住冷氣咁買餸呢？依家一個App就幫到手！不過，暫時僅限內地街市。
是咁的，響北京大型街市，有個大媽檔主每日都會經買餸App收「柯打」，然後火速執好訂單要求嘅餸菜，交畀指定時間嚟領取嘅「外賣仔」，直接送到訂購者屋企。
以上一條龍嘅手機應用程式經營模式，唔單止改變咗傳統街市嘅營商環境，仲帶挈一眾檔主生意改變咗好多！
北京朝陽區金旭街市女檔主透露，買餸生意近月轉趨數碼化，佢搖身一變成為執餸達人，有時仲會叫員工去隔籬肉檔同生果檔幫客戶買餸，即係一張單包晒蔬菜、肉類同生果。難怪生意最勁試過一個月有成13萬人仔，比以前搵多幾倍。
事實上，有唔少私募基金一早就睇好買餸App呢個市場。過去短短一年間，紅杉資本、高榕資本、琥珀資本同老虎基金等，紛紛投資入一啲初創企業嘅買餸App。
直至今年年初，擁有騰訊控股（00700）背景嘅美團點評（03690）旗下美團買菜、阿里巴巴背景嘅餓了麼買菜服務，同埋蘇寧雲商集團旗下嘅蘇寧小店等巨頭，都紛紛加入競爭搶食。好似北京同上海呢啲大城市，買餸App嘅戰況就更加激烈。
試諗吓，內地大城市將來嘅街市，將會愈嚟愈少機會見到師奶或者靚太買餸，反而係逼滿咗一堆「外賣仔」喺度等送餸菜。
余絲韻