絲絲講場：滙控價殘小股東鬧爆

股東會「打蛇餅」 排隊問責

難得范寧同集團主席杜嘉祺專程由英國飛嚟香港，過百名小股東早喺總行地下大堂「打蛇餅」等入場，趁機向一眾管理層「問責」。有一名股東話當年貪滙控高息，將一半身家瞓身買入，誰不知股價一沉不起，過去半年都未升穿過70元關，希望集團可以增加派息，同埋提出股份回購推高股價。

但范寧就話，滙控舊年業績多個指標錄得明顯改善，現階段需要預留資金投資其他業務，所以會繼續維持現有派息政策。佢又話，非常感謝香港股東多年來一直咁信任滙控，有信心未來繼續穩健增長，以穩定股息回報股東。

滙控范寧話，未來會繼續維持現有派息政策。

有滙豐標誌嘅紅色金屬暖水樽。

叫杜嘉祺套用友邦方針

另外多名股東都以杜嘉祺嘅「舊東家」友邦（01299）股價為例，質問佢點解友邦股價日日創新高，相反滙控就無咩起伏，請求佢將友邦良好管治方針應用喺滙控上；杜嘉祺就笑笑口話，管理層唔會安於現狀，但業務需要時間逐步增長喎。

其實每次出席股東會，大家最期待都係份股東小禮物，而今年就係一個印有滙豐標誌嘅紅色嘅金屬暖水樽。有股東就即場投訴，「專程過嚟總行拎禮物，點知得一個水樽」，仲話近年都有其他藍籌企業喺股東會送名牌保溫瓶，比滙控今次送呢個靚好多！

余絲韻