絲絲講場：太興炒河機械人識拋鑊
機械人發展日新月異，但勢估唔到連乾炒牛河都可以用機械人嚟炒！申請緊上市嘅太興飲食集團就別樹一格，推出咗一款名為「自動炒鑊系統」嘅半自動機器，除咗可以用嚟炒牛河外，炮製類似星洲炒米、鹹魚雞粒炒飯嗰啲用鑊嚟炒嘅菜式都絕對無難度。
呢個「自動炒鑊系統」兩年前由集團主席陳永安自行研發。部機識自動拋鑊，廚師就只須聽指示，落醬油、芽菜等，最後將河粉上碟就完成菜式。據透露，呢個系統研發出嚟係希望方便廚師，令佢哋炒菜時更加容易上手，拋起鑊嚟都會輕鬆啲。據稱太興依家唔少分店都用緊呢部機器，並且已經係第二代，仲不斷咁改良緊，很快會出現第三代、第四代添！
至於啲牛河好唔好味，咁就真係要試過先知囉！
余絲韻