絲絲講場：企鵝仔遊戲上鎖 想玩先問阿媽
俗稱「企鵝仔」嘅騰訊（00700），為咗配合內地監管機構針對細路仔沉迷遊戲嘅政策，騰訊互動娛樂用戶平台部總經理鄭磊透露，自己基本上隔周就要去北京，同相關監管部門溝通，睇吓騰訊點樣做到細路仔唔會沉迷打機。
13歲以下新用戶須認證
鄭總稱，依家愈來愈多家長用佢哋嘅未成年用戶成長守護平台「超級家長」，呢項係科技手段，畀家長實現遊戲時間管理（包括時長設定、時段設定）、禁止充值、一鍵禁玩等功能，而且可以實時監察子女打機。
日前，騰訊再宣布開始測試一項全新嘅「兒童鎖模式」，十三歲以下未成年新用戶喺首次登錄遊戲之前，將會被強制要求進行「兒童鎖」嘅登記認證。只有佢監護人完成解鎖後，先能夠進入遊戲，如果未解鎖就會被禁止登錄。
鄭總又話，希望通過「兒童鎖」，能夠讓細路仔想玩遊戲嘅時候，可以事先同父母溝通一下，咁樣雙方因為打機而產生嘅矛盾都少啲！
余絲韻