Market Insight：滙控依然啱穩陣派

唔理指數 專心炒個股

從基本面睇，市場流動性充裕當然係一個關鍵因素，所以無論係美股抑或是中港股市，近日走勢都靠穩。就算近期美股道指受波音事件影響而回軟，但單單一隻巨無霸亦拖唔低成個指數，所以策略上都係順勢炒住人氣個股最穩陣。

近幾個月持續見有熱錢流入體育用品股，其中李寧（02331）及安踏體育（02020）可謂悶聲發大財，股價幾個月內累升不少，昨日輪到特步國際（01368）藉業績爆上，全日勁升19.8%收報6.35元，成交增至1.6億元配合升勢，值得望多兩眼。

特步去年張成績表確係有驚喜，截至去年十二月底止全年盈利按年大升60.8%至6.56億元人民幣，略高於盈喜時預測的50至60%之上限。古勝認為，除業績刺激外，其股價相對大幅落後兩隻體品股，亦係重要因素。

首先，觀察番李寧、安踏同特步日線圖，會發現特步行慢幾條街。李寧及安踏股價，早已衝破或逼近去年中高位阻力，相信吸引咗部分資金轉而追捧落後的特步。此外，三股的往績市盈率分別約43倍、27倍及18倍，純睇數字，確係為追落後提供到支持理據。再考慮到行業前景好轉及業績因素，升得合情合理。

咁何解行業前景轉佳呢？講到尾又係炒中央要谷內需、促進消費來撐住經濟。尤其是國家發改委及體育總局早前亦已定下目標，冀於二○年將全國體育消費總規模提高至1.5萬億元人民幣，因此亦吸引部分資金流入炒作。

特步升勢過急須調整

策略上，特步係咪「一步到位」就未知，但股價經過急升後，9日RSI去到85的極超買水平，若然近日炒業績股成功扑中的投資者，有利潤在手不妨先食一轉。正如賣波鞋都唔會一日就賣得晒，最緊要長賣長有。所以部署上都一樣咪心急，等佢調整至10天線水平先出手吸納，相對會坐得較安心！

此外，港股近日在兩萬九點關口前上上落落，魚缸一班穩陣派散戶又可以搵乜嘢做目標呢？其實值得睇吓隻滙豐控股（00005）。

該股波幅唔大，近期又跑輸大市，絕非短炒選擇，但勝在業務穩打穩紮，加上息率達6厘，尤其是目前市場的好消息出得七七八八，一旦個市唔炒上轉為炒落，滙控能起到一定防守作用。近幾個月滙控股價每逢落到63至64元水平均見不俗承接力，建議可作分段收集。

古勝