香港交易所（00388）將喺下個月廿四日開股東周年大會（AGM），今屆董事局成員變動不大，只有梁高美懿因夠六年任期，將於今年AGM完結時退任。
梁高美懿係政府委任董事，佢退落嚟後，究竟政府會委任邊個入局，大家拭目以待！不過，主席史美倫去年上場後，大力改善港交所企業管治，更新咗該所嘅董事會成員多元化政策，以董事會達致性別均等為長遠目標。
依家港交所只有三名女性董事，包括史美倫、梁高美懿及馮婉眉，比例僅25%，唔知政府會唔會再搵女士入局？
除梁高美懿，今年仲有三名政府委任董事馮婉眉、席伯倫、姚建華，以及一名股東選任董事阿博巴格瑞嘅任期屆滿。不過佢哋都有資格再獲委任或重選。港交所提名及管治委員會亦已提名阿博巴格瑞再參選董事。
講番企業管治，史美倫除要求管理層要有繼任計劃，亦將股東選任嘅非執董任期上限由十二年縮短至九年，冀為董事會引入新思維。換言之，當非執董陳子政二一年任期屆滿時，因已連續做咗十二年，屆時亦要退任。
余絲韻