絲絲講場：比特大陸雙雄捱到走晒樣？
內地三大掘礦機生產商去年紛紛嚟港申請IPO，其中龍頭比特大陸（Bitmain）嘅申請至今仍無聲氣，其餘生產商嘉楠耘智及億邦國際去年嘅上市申請失效後，前者有意轉去美國掛牌，後者再重新在港遞表，但能否上市仍是未知數。
比特大陸官方極少對外透露其經營狀況。而據內媒消息，兩位久違嘅創始人詹克團及吳忌寒，喺早前舉行嘅公司年會上出現，有張現場相片顯示詹克團攞住紙巾抹眼淚咁，吳忌寒搭住佢膊頭，好似安慰佢。以上畫面或令人聯想到佢哋所面對嘅辛酸局面。
詹克團傳四川開礦場
其實，自去年下半年起，虛擬貨幣已步入熊市，十二月中時，比特幣價格更創全年低位3,136美元，隨後市傳詹克團及吳忌寒同時卸任比特大陸CEO職位，只維持大股東身份。
然而，比特幣昨曾見3,722美元，與去年十二月中低位相比，反彈近19%。二人亦傳來新動向，據悉詹克團復出，打理新設嘅四川比特幣礦場，並已部署10萬台掘礦機。據聞四川礦場將於五月開張，用水力發電。至於吳忌寒，據悉亦有新任務，未來可能會負責一家名為Matrix嘅公司，現正重新籌組團隊。
余絲韻