MarketInsight：入市咪心多專注強勢股

睇番滬綜指周一大成交配合巨大陽燭，周二升勢回順，到昨日只能微升0.4%收報2,953點，係就係未能攻破三千點大關，始終短期升得過急，就算中線前景已改善，短期抖一抖氣儲夠力先再上都好正常。故家陣回調，係要走貨還是趁低吸納良機？古勝就傾向後者。

內銀板塊重點關注

再睇埋外圍因素，周二聯儲局主席鮑威爾出席國會聽證會時表示，對未來利率政策調整保持耐性，投資市場除憧憬美息未來唔會點加外，亦期望縮表計劃盡快結束。再加上中美貿易談判發展樂觀，以及中美貨幣政策皆有意轉寬鬆的方向發展下，預計港股後市即使要回調，都唔會跌得太多。

策略上，正如在下昨日所講，如果指數要上，要睇實指數重磅股騰訊控股（00700）。另外，留意到今個反彈浪中，明顯跑得慢過大市的還有內銀股。原先古勝認為，內銀板塊可受惠於人行大幅放水救市以及投資景氣回暖，但從年初至今這段反彈勢頭睇，內銀上升動力明顯較弱。

若然從樂觀方面睇，可以話係大戶有意壓住內銀來買其他股份，避免恒指太早升上三萬點樓上。故此，策略上不妨將內銀放入觀察名單，若見其升勢突然轉急，或揭示新一輪資金已進入全面買貨的新階段，對中長線部署起重要啟示作用。

回看港交所業績，截至一八年底止全年盈利按年增長26%至93.12億元創新高，期內收入及其他收益達158.67億元，按年增長20%，主因現貨成交及衍生產品市場交投增加，帶動收入上升。照咁睇，若中美貿易戰真係可以在短期內初步有共識，加上環球央行幣策轉向寬鬆下，股市氣氛再度升溫，相信來港上市公司有機會進一步增加。

港交所逢回調吸納

單係呢幾個利好因素，港交所已有不俗炒作空間，而短期股價之回調，可視為中線吸納機會，相信上半年挑戰300元關口機會唔細，以跌穿20天線作為止蝕參考。

此外，近期資金主力追逐強勢股或鑊氣較重的板塊，所以弱勢股免得過都唔好掂。昨日又輪到新能源汽車股及電池股現調整，主要受累於比亞迪股份（01211）去年業績淨利潤按年減少31.3%，引致股價單日跌4.4%，吉利汽車（00175）亦跌2.3%，電池股中天能動力（00819）更急跌逾一成。所以策略上，繼續建議專注於逢低收集強勢股份。

古勝