退休無憂：40歲前退休 年輕人點睇？
William 39歲就退休上岸，大前提當然是有穩定收入。雖然不少年輕人正努力為前途打拚，但他們可有想過40歲前退休？
夢想過奢華生活 80後 Anlou
80後手機維修店東主Anlou表示：「未夠40歲退休、而且手上仲持有48個物業，真係勁！我諗，呢位主角仲要幫自己管理資產，都唔算好悠閒。想當年，自己頻頻炒股時，都有諗過賺夠就提早30歲退休，夢想揸住幾千萬現金，有兩層樓，一層自住，另一層租畀人。幻想每日瞓到自然醒，起身揸住架法拉利遊車河都幾爽！不過，暫時生活同夢境相距好遠！」
做到65歲更有益 90後 Natalie
90後女生Natalie表示：「我完全冇諗過幾多歲退休，依家27歲，如果40歲前就退休，當然覺得好正，但睇怕冇乜可能，因為自己26歲時先再返去讀書，最快都30歲先畢業，想像吓到時再打10年工就可以退到休？除非我中六合彩頭獎啦！但另一方面諗，人做到65歲退休都好嘅，有啲細藝，好過日日無所事事。」