絲絲講場：巴郡兩老鬥爆長壽秘訣

生活簡單 謝絕怨恨

佢哋雖然年紀唔輕，但依然行動自如，思路同說話又清晰，真係唔嘢小。到底佢哋究竟有咩秘訣呢？芒格上個星期自己解畫！

佢話：「今時今日人類對生命嘅奧秘充滿疑問，咁又點會活得開心又長壽？其實，答案好簡單，就係『簡單』。」而芒格傳授嘅長壽秘方包括「冇太多嫉妒」、「冇太多怨恨」、「唔好入不敷支」、「儘管有咩麻煩，都要保持愉快」、「要同可靠嘅人打交道」、「做你應該做嘅事」、「所有簡單嘅規則都能夠令生活變得更加好」。

芒格仲話：「保持愉快係明智嘅做法，唔好被負面情緒充斥。當完全陷入深深嘅仇恨同怨恨時，你會開心咩？當然唔得。咁點解要接受唔開心呢？」

講番兩位老人家巴菲特同芒格嘅淵源先，佢哋喺一九五九年認識，當時巴菲特28歲，而芒格就35歲，此後就一直拍檔至今。

不過，如果講長壽秘方，相信冇人夠膽學「股神」！巴菲特嘅「高脂飲食」無人不知，每日早餐係麥當勞快餐，每日更加平均飲5支可樂，兼仲鍾意鋸扒。

佢曾經話：「我翻查過統計，6歲係死亡率最低嘅年齡級別，所以我要保持6歲嘅飲食習慣，咁至係最安全。」

余絲韻