Market Insight：中資電力股擇優吸納

睇番數據，中國去年GDP增長6.6%（一七年增長6.8%），雖然係二十八年以來低位，但由於一早預咗，所以負面情緒唔大，反而因為結果無差過預期，市場當成好消息嚟炒，揭示當下投資氣氛唔錯。

權重股走勢就繼續級級上，騰訊（00700）昨日再升0.8%，港交所（00388）升1.5%，但係見友邦保險（01299）明顯在70元頂住咗，睇怕要整固一輪先有機會再升。

港交所獲大摩唱好

講開權重股，都係建議睇住隻騰訊同港交所做人，尤其是早前已經在不同板塊撈咗貨的投資者，除咗可以睇番自身個股股價走勢外，亦可以睇埋呢兩大指標股。當中港交所更在今轉反彈浪中行先大市一步（其實股價早於去年十月已見底反彈），若見股價停步甚至回調，咁看官不妨先行減減磅或直接食胡。

不過，大摩近日發表報告，指港交所三十日內將可跑贏大市，繼續叫人「增持」，目標價睇290元。如果港交所真係一如大摩所料，股價愈升愈有的話，咁港股照理都有得繼續上，如果現時手頭無乜貨的投資者，值得揀隻心水股細細注落場。

入市目標方面，早前汽車、家電、手機設備股及中資航空股都彈過一輪，短期要抖一抖氣唔出奇。反之，隨着GDP數據冇壞消息，與製造業息息相關的電力股隨時有機炒一轉。加上國家統計局最新數據顯示，受全國大範圍低溫天氣影響，用電需求增加。去年十二月發電按年增長6.2%，增速按月加快2.6個百分點。全年發電亦按年增長6.8%，增速較上年加快1.1個百分點，為一四年以來最高增速，數據有利電力股再上。

穩陣派揀番公用股

睇番幾隻中資電力股近期都有反彈，且現價相對歷史高位甚遠，具一定值博率。其中以華電國際（01071）及華能國際（00902）近期上升動力較強，且有成交配合，值得吼個好位走一轉。華電守穩升軌支持約3.3元可續持有，不設目標價；華能短期在4.7至5.1元水平橫行，預期整固後有力再上，不妨候低吸納，中線目標睇6元，跌穿4.5元止蝕。

最後，如果依然覺得港股中線前景唔樂觀，短期又唔願意追勢買當炒股的話，近期投資氣氛好轉，資金都相繼撤出公用股，好似中電（00002）、電能實業（00006）及領展（00823）走勢都見回軟，咁反而造就穩陣型投資者作中線策略部署，提供機會低吸防守股。

古勝