Market Insight：博內地加碼放水 搵受惠股

雖然話，今年以來港股表現跟A股多過美股，但若然明年美國經濟真係唔掂，美股大冧，只怕覆巢之下難有完卵！

後市展望偏向悲觀

古勝承認，呢一刻對後市展望是偏向悲觀，尤其是美國市場，皆因總統「侵侵」的典型大商家性格，不但害了美國人，仲拖埋全世界人落水。明年首季，中美能否就貿易問題達成協議至為關鍵。若然反枱收場，大家可以疊埋心水收起個鑊鏟了。

皆因對住魚缸，一來冇嘢好炒，二來即使係玩指數輪證，唔係冇波幅就大上大落，都係十居其九損手收場，最慘係消磨意志，到真正出現操作機會，都唔識得作出反應。

但話分兩頭，對中國市場而言，古勝喺悲觀中仍不無期望，學上大人話齋，中國關埋門食草或者都可以捱到一年，美國就……如今中國將進行大型減稅降費措施，加上引進外資進入資本市場的渠道漸趨完善。歐美冇得炒，咁班大鱷都要搵食，終歸要找個「結緣」對象。

今年人民銀行多次降準，估計累計放水規模已超過4萬億元人仔，比○八年海嘯還要重手。之不過，當前中美貿易戰，內地經濟所面對的危機比○八年還要大，相信放水力度還要不斷加大，才能應付沉重的下行壓力。

由於呢幾次降準，都係屬「定向」，即有特定用途居多，以防止資金流去炒賣。亦正因如此，其實降準對於刺激資本市場，提振人心的作用唔係好大。

中國人話，一年之計在於春，在下相信，明年首季內地確有可能減一次息，實實際際為投資和消費信心打打氣！最近美元偏軟，人民幣匯率趨穩，正為減息創造條件。

炒減息 揀內房券商

若然要博內地再放水挺經濟，首要留意的當然係直接受惠減息的內房股，但唔建議沾手民企背景的內房股，穩陣起見，都係離不開華潤置地（01109）及中國海外（00688）。其次是中資金融股，如券商股，上周五見光大證券（06178）及中金公司（03908）都有動靜。

此外，若減息，部分高負債股可能飆得較快。但其實減一次息對呢啲高危股未必幫到好大忙，故唔建議沾手。至於消費類股，相信表現較個別，畢竟明年經濟景氣差，故相信當消息一出，升得快回得亦快，且升勢集中個別優質股。

古勝