Market Insight：公用股隨時有起「息」

事實上，資金短期「龜縮」都好合理，上周四美股感恩節無市，周五得半日市，加上中美元首G20峰會的會談結果根本無得估，尤其是市場氣氛初現回暖之際，又傳出美國正游說盟友擬封殺華為，並考慮避免使用中國製造的電訊設備，為貿易戰再起新波濤。咁投資者都睇唔通，不如離場好過，留喺魚缸等發霉咩！

騰訊暫受制50天線

靜市要突圍唔易，上周五只係見部分周四已經起動的燃氣股逆市升，其他板塊多數跟住大市下跌。最慘係好友早前幾經辛苦先推到騰訊（00700）上返50天線，不過得一日貨仔又再得而復失，似乎50天線阻力並非浪得虛名，後市股價唔上破兼企穩50天線兩三日，似乎都係博唔過。

此外，近年「聖誕鐘買滙豐」呢支歌仔冇乜人唱，即使滙豐控股（00005）受惠加息周期有利淨息差擴闊，不過同樣受住中美貿戰及環球經濟增長放緩等不明朗因素拖累。睇番走勢，滙控股價近期窄幅上落，暫時又係受制於50天線約66元阻力，短期同樣要睇定啲先。

市況淡靜，預期資金短線或先泊番去早前跟隨大市回落的公用股及收息股身上。咁又難怪，一來市場轉炒美國加息隨時降速甚至暫停加息，在美息與公用股息率短期內未再進一步擴闊下，後者自然有番吸引力；二來美國五大科技股「見熊」，避險意識上升；加上貿易戰前途未卜，同樣增加資金短泊收息股作避風港之需求。

策略上，如果要押注，當然亦要篩選一下。中電控股（00002）、中華煤氣（00003）及電能實業（00006）唔係唔好，不過就少咗炒作話題；領展（00823）業務穩建，但考慮到早前累升唔少，加上七月開始營造的圓頂形態都幾明顯，唔上返去78元都係唔使留意住。

相對地，擁供港東江水業務，又有巨額現金在手的粵海投資（00270）為隸屬廣東省國資委的粵海控股在港上市旗艦，加上股價走勢屬悶聲發大財格局，跟進價值較大。

粵投現金流夠穩定

集團截至今年九月底止九個月收入99.51億元，按年增加9.4%，在投資物業公平值大減下，淨利潤42.26億元，減少約14%。估值方面，現價往績市盈率約16倍，息率3.2厘，集團手頭現金充俗，獨家經營的東江水業務提供穩定現金流，防守力不言而喻。

走勢上，粵投股價年初至今反覆向上，每次跌到落100天線（現約13.6元）皆見承接力。惟港股處身熊市下，唔建議高追，不妨留意低吸機會，目標價16元，跌穿13元止蝕。

古勝