絲絲講場：沈大師金句Sticker爆紅
最近WhatsApp推出新功能，搞到幾乎全人類都以Sticker（貼圖）代字，財經界亦有以人稱「沈大師」嘅訊匯證券行政總裁沈振盈為主角嘅「沈判日」系列，沈大師畀人玩「睇好唔做好，睇淡唔做淡，最好靠邊站」嘅Sticker紅爆！
咁沈大師點睇？點知當事人竟然未知有呢回事！咁有冇些少嬲嬲豬先？沈大師話完全唔介意大家拎佢嚟做圖，仲讚網民夠創意！
Sticker好方便但佢始終最鍾意真人版（即係Video），因為夠傳神！不過個Sticker新功能咁Hit，聽落幾過癮，話得閒會研究吓，有機會整番套，等大家都開心吓咁話。
最愛「一股不留」 幫散戶保本
講到「官方版」Sticker，沈大師嘅心水金句係乜先？佢斬釘截鐵就話：「唔使諗，『一股不留』！」事關呢句今年幫到唔少股民喎！佢認為，股市下行，股票係唔需要留，佢話唔少股民聽到佢句「我已一股不留」，就走晒啲貨，保住咗個本咁話。
查實佢金句多多，絲絲睇番，仲有好多選擇喎，好似「升上火星的價，終須返回地球」、「Cash Is King」、「今日無路可教」，仲有近排應用性都幾高吓嘅「騰訊一定大鑊」咁，儲存定幾個Sticker，隨時啱用。
講開又講，絲絲位上司呢排亦上咗Sticker癮，絲絲早日收到佢無比溫馨嘅「唔返工，唔係人」Sticker後，半秒內打孖回佢兩個「唔返工人生無意義」與「老細我求你，我想OT」貼圖。所以話，呢啲點可以唔袋定幾個喺袋！
余絲韻