Market Insight：傾向揸現金 防守股走樣

美國總統「侵侵」所屬的共和黨失去眾議院控制權，雖然會減低未來施政暢順度，但只要一日在位，相信中美貿易戰都唔會咁易打完。同時，共和黨獨攬白宮與國會兩院大權的時代終結，令市場對美國未來施政的可預測性降低，對投資市場其實增添多一重不明朗因素。

港股再升空間料有限

昨日港股以至亞太區股市午後都回軟，但道指期貨就做好，皆因美匯指數向下。其實喺「侵侵」任期內，無論環球經濟係升定跌，在美國息口持續上升下，確實睇唔到資金會停止流入美元資產的可能性，故未來美股應可延續跑贏環球大市之勢。反之港股在中央對人仔匯價「守七」意志消沉下，就算可以再彈，再上空間都唔見得特別多。

睇番近兩日港股雖然觀望氣氛甚濃，但資金總要搵啲嘢炒，其中醫藥相關股就有番些少起色。好似勵晶太平洋（00575）及希瑪眼科（03309）全日分別升16%及14.7%，真係叻過唔少大藍籌。

不過，上述兩隻股份估值唔平，忽然受捧都係因為板塊氣氛回暖，以及大市基本上無乜好炒，所以資金先湧入板塊短炒一轉。好似希瑪炒上主因是近期集團港股通持股佔比明顯上升，反映升勢係由北水帶動。

不過，現價5.85元與今年一月「暴炒價」高位19.9元仍相差幾丈遠，上面成批蟹貨等住沽，而且集團上半年少賺52%至1,202萬元，現價往績市盈率高達112倍，無論從邊一個方面睇，亦好難買得落手。

炒消息股提防接火棒

至於勵晶太平洋，就係靠成功在香港註冊早洩藥Fortacin而炒上，不過始終盈利貢獻需時，股價即市高見0.355元，惟尾市升幅已收窄至16%報0.325元，9日RSI高見86進入超買區，技術上調整風險機會大。所以計落如果唔係早兩日買落，而係家陣先去追買上述兩股，都幾大機會落得接火棒下場！

最後，有一點值得留意，早前港股反覆下跌之時，部分防守股或傳統收息公用股都發揮唔錯避險作用，就算唔升，起碼跌少過大市。不過，近月見中電控股（00002）、中華煤氣（00003）、恒生銀行（00011）及領展房產基金（00823）等都開始走樣，似反映市場上部分避險資金已轉為選擇增持現金比重，而唔再係追捧防守類股，故未來港股若再現大跌市，奉勸大家寧願跟大隊揸現金，以免從一個火坑跌落另一個火坑。

古勝