絲絲講場：魅族暗寸小米自殺式經營
昔日曾經同小米鬥個你死我活嘅國產智能手機廠商魅族，今年第3季內地出貨量僅189萬部，市佔率得番1.8%。內地網民喺社交群組爆料，指公司剛推售嘅兩款新智能手機魅族Note 8和魅族X8竟然只有幾百部嘅銷量，真係跌到落谷底！
據市場調查機構賽諾公布今年第3季內地智能手機市場出貨量排名，小米出貨量達1,261萬部，魅族連零頭都比唔上。而今年首3季止，魅族手機內地總出貨量就得番887萬部，全年計出貨量估計得番過千萬。
唔好睇魅族今年咁霉，查實舊年內地出貨量超過1,600萬部，全球2,000萬部，都有威過o架。
轉型「小而美」 唔鬥減價
魅族創始人黃章寸爆話，公司今年轉型「小而美」，同嗰啲一味衝銷量，做蝕本生意，但求清倉底貨嘅廠商絕對唔同！佢又形容，如果繼續只靠性價比打仗、犧牲利潤，魅族就係自殺！計絲絲話，佢雖無點名小米，但講到個量咁大，仲有邊間吖？
雙十一購物節就快到，但魅族要確保利潤而無參與手機減價戰。
黃章憶述前幾年，魅族大規模擴張。雖然低端產品銷量大升，但高端旗艦機愈做愈差，無咗好多客。黃章講到咁慘情，絲絲惟有祝佢嘅「小而美」戰略成功啦。
余絲韻