孖妹S檔案：港股十月市未衰到盡頭？

王：自稱佛系投資者　王善行

美股高位插15% 港始見底

Kitty：港股上周四大跌926點，嚇死我！

彩兒：我聽到有市場人士話，若大股災殺到，股市單日會跌10至15%，點會似上周四跌咁少？

王：我同意，今次跌得比我預期少，今個月仲有得跌！然而，熊市啱啱開始，可能十一月會反彈一下，但預料之後會繼續下跌，直至美股由高位累積下挫15%，港股先會見底。

事實上，我月初買入認沽期權，做定防風措施，但剛喺上星期四及五已經平晒倉。另一方面，我認為恒指23,000至24,000點係港股價值區，再沽落去值博率唔高。

點睇十月：仲有得跌

建議投資：認沽期權

王善行	沈顏	林樵基

沈：中資投行資深從業員　沈顏

等多一個月可諗高息股

Kitty：港股真係陰霾密布！

沈：雖然唔少藍籌股已由高位跌逾三成，但港股成交仍少，料港股跌勢持續。況且今次中美貿戰未打完，美國勢要將中國邊緣化，相信貿戰對經濟嘅負面影響會喺年底至一九年陸續浮現。另香港剛展開加息周期，市況未明朗，投資者要審慎入市。

彩兒：依家仲有翻身機會？

沈：等多一個月啦，到時可考慮買入防守型股份作長線投資。我睇好高息藍籌股、銀行股及電訊股等，如中國移動（00941）及中國鐵塔（00788）。高息內房債都唔錯，其股息率達10厘。內房業績會披露已簽約但未入帳嘅物業銷售額，推算到其未來收入。只要公司唔好瘋狂買地，其債券違約風險應該幾低。

點睇十月：仲有得跌

建議投資：高息藍籌股、銀行股及電訊股

譚紹興	繆子美	鄧建初

林：光銀國際董事總經理兼研究部主管　林樵基

REITs料仍受惠商舖市道

Kitty：投行中人叫買高息股喎！

林：買高息股好，息率最好高過3厘，即目前港元或美元定存平均息率。我睇好華潤電力（00836）及香港電訊（06823），其股息有5厘以上，亦唔太受貿易戰影響。

彩兒：香港近期失業率維持2.8%。

林：香港經濟唔差，寫字樓市場供不應求。冠君產業信託（02778）旗下物業商舖都續咗租，租金仲有加到，股價料升。我睇好主要投資甲級商用物業嘅房地產投資信託基金（REITs）。

點睇十月：繼續跌，但未係股災

建議投資：房託基金（REITs）

譚：香港投資者學會主席　譚紹興

華或再降準 A股望飆15%

Kitty：股市差成咁，藍籌股係咪理想避風塘？

譚：港股已連跌5個月，睇番過去30年，呢個情況十分罕見，我估再跌多一周就會反彈，建議投資者買入盈富基金（02800）、滙豐控股（00005）及安碩A50（02823）。滙控股價若跌到60元，料息率會飆至6厘以上，高過普遍歐美銀行債券息率，繼而吸引資金湧入。

彩兒：A股都會炒上？

譚：A股市盈率及市帳率都跌至歷史低位，相信已進入牛市一期。而MSCI明晟及富時羅素紛紛增加A股比重，另預計中央喺農曆新年前會有多兩次降準救市，料A股將爆升15%。

國家隊救市一向都會炒起內銀股先，唔排除中央匯金及財政部都追捧內銀股。此外，A股升，持有大量A股嘅內險股都會炒上。

Kitty：好多隱形富豪靠買樓發達，樓市跌番少少，係咪置業好時機？

譚：10年前我錯過買樓機會，依家惟有繼續等！一般港股有大型調整，樓市都會炒上，估計當恒指觸及25,000點，會係一個置業信號。再者，起樓成本包括鋼筋、水泥及勞工等，加埋每呎成本逾6,000元，所以樓價跌極有個譜。

彩兒：我得少少錢咋。

譚：買香港地產股啦，目前股價罕見低過資產值五成，如果樓市唔係跌太多，地產股會反彈，長線睇好恒基地產（00012）及新鴻基地產（00016）。市場憧憬明年恒基系會有重組計劃，或令恒地股價升。

點睇十月：再跌多一周會反彈

建議投資：內銀股及香港地產股

繆：荷寶投資管理中國首席投資總監　繆子美

美政局難料 內地經濟危

彩兒：金融市場目前係咪危機四伏？

繆：我對後市持觀望態度，投資者可小注買入電訊、公用及基建股，因其估值平。不過要留意，市場仍有好多風險，如美國中期選舉，兩黨勝負難料，而結果對美國總統特朗普施政，以至中港股市都有深遠影響。

另外，香港進入加息周期，按揭供款壓力增大，樓價或下跌，所以唔建議投資者買香港地產股。而目前油價雖然回軟但仍處高位，加上貿戰加徵進口關稅政策，都推升美國通脹，令加息條件更充分。我預計，美國及香港將加息至二○年先完，今年底將再加息一次。

Kitty：貿戰搞到兩敗俱傷，連美股都開始跌。

繆：然而，美國經濟增長一直喺上升軌，但中國經濟就有下行風險，料中國企業將公布嘅第三季盈利增長會有負面消息。再者，美元轉強，唔少資金由新興市場，包括由中港股市逃跑出嚟。

點睇十月：觀望

建議投資：電訊、公用及基建股

鄧：時富證券聯席董事　鄧建初

揀板塊入市 賺半成食胡

彩兒：港股幾時先有轉機？

鄧：港市好亂，未有方向，要等十一月美國中期選舉結果再算！若恒指收市升穿26,373點，港股會反彈；相反升唔穿嘅話，會繼續尋底。留意升市時係咪補空倉，彈一彈再跌。

投資者入市，宜密食當三番，賺5至6%就食胡，可考慮買入資源、基建及內需股。至於內房及科網股，一七年吃香，今年就捱沽。另加息利好銀行股，但又無話很不利香港地產股嘅。因加息因素早已反映，香港地產股率先跌，未來再宣布加息，股價可能仲有得彈。不過，要買都只宜短炒波幅。

睇位買定內銀博放水

Kitty：新樓開始劈價促銷，樓市係咪會大冧？

鄧：早見頂，新樓宇按揭息率多由以往銀行同業拆息（HIBOR）改用最優惠利率（P），令買家更難上車。而若政府撤辣招，料住宅供過於求，市場會有一輪沽售，加快樓市跌勢。施政報告提出發展大嶼山，建造多個人工島，令住宅供應大增，增加樓市下跌風險。

中國經濟短線或令人失信心，但長遠料無問題。我覺得內地會似香港咁，喺地產、服務、金融及旅遊業蓬勃發展。若想短炒A股，試試咁部署，當周五A股無急升，買入內銀股，博周六或日公布降準及中美貿戰有轉機等利好消息，刺激A股於緊接嘅周一反彈。

點睇十月：繼續混亂

建議投資：資源、基建及內需股

余：余礎安會計師事務所創辦人及主席　余礎安

沙士經濟頹況恐重臨

彩兒：會計界嘅你有咩投資部署？

余：我預計中港股喺未來一年都係下跌為主，所以我依家無揸住，亦唔打算追入任何公司股票，淨係有一隻反向產品FI南方恒指（07300），喺5.5元入市，帳面微賺。

不過早喺中美貿戰開打前，已有迹象顯示中小企生意愈嚟愈難做，因內地去槓桿，令企業融資困難，致經濟活動減。其後更出現貿戰，中小企雪上加霜，就算暫未受影響嘅企業都心慌慌，唔敢擴充。另內地國進民退嘅政策都對多個產業民企不利。

跟央行作風 吼黃金ETF

余：我打算買SPDR金ETF（02840），金價若能企穩1,200美元，就會有一個上升趨勢。另外，唔少央行都買緊黃金，以去美元化應對政治及貿易危機，所以跟追應該唔會錯。

Kitty：美股都會一齊跌？

余：美股無咁大鑊，因美國掌控環球股市，會因應市況應變，而中港股相對被動，會差啲。事實上，我無揸任何物業，亦唔睇好樓市，因過去失業率同樓價有密切關係，如○三年沙士時，樓價創新低，失業率就創新高。

我擔心未來香港失業率會因經濟收縮而狂飆，以及樓市轉跌，直至有強而又力嘅托市方案推出，類似過去量寬或開放個人遊等，情況或先有轉機。

點睇十月：本月至未來一年都下跌

建議投資：反向產品及黃金ETF

Kitty 彩兒