Market Insight：騰訊短炒轉身要快

事實上，美股十一月初中期選前會唔會再大插就冇得估，但從技術走勢分析睇，港股上周四個巨大下跌裂口一日未補完，一日都有再向下尋底機會。

古勝建議如果股民仍有貨在手，要切記每次反彈市都只不過係開多次「逃生門」畀大家走貨，千萬唔好多手痕入場，事關現時市場氣氛極差，要押中上升的個股贏錢難度極高大。反而有時識得唔做唔錯，隨時可「被動地」跑贏大市！

基本因素未有改善

睇番走勢，恒指上周五彈番535點收報25,801點，但與周四跌逾900點，並出現巨大下跌裂口可謂小巫見大巫。加上全星期計，其實累跌771點或2.9%，恒指周線圖更呈三連陰，走勢利淡。唯一慶幸是，周五當日成交都有1,111億元，叫做有啲買盤入市支持。

連續24日回購的股王騰訊（00700），上周五終結束十連跌，反彈8%收報288.4元，並率先回補埋個巨型下跌裂口。但大家要記得，騰訊早前持續跑輸大市，如今威番一次都好正常。

其實，集團基本面並無大改善，今次反彈只可視為急跌後的技術反彈，日後再跌機會仍然唔細，所以就算上周成功入市博反彈者，今個星期都唔好以為可以照辦煮碗，慎防貪勝不知輸。

睇番上周五，貢獻恒指最多的當然係股王，有177點，其次係友邦保險（01299）有90點。至於中資金融股合計貢獻都唔少，建設銀行（00939）、工商銀行（01398）、中國銀行（03988）、中國平安保險（02318）及中國人壽（02628）合共貢獻恒指112點，其他藍籌則個別發展，升勢唔算太全面。

金礦股值博率一般

值得一提，上周五港股以至亞太區股市反彈，有部分原因是美國上周中出現股債齊跌的奇異場面後，市場避險需求雖然上升，但既然美國股債都有暗湧，啲錢惟有湧入金市，除令美匯指數從96樓上稍為回軟至95外，人仔亦間接受惠反彈。

講開黃金，上周四晚金價升穿1,220美元，帶動金礦股跑出，紫金礦業（02899）及招金礦業（01818）分別升5.4%及6.6%。不過，金礦股一向唔會跟足金價走勢，加上市場波動下，資金來去快如閃電，若睇好黃金後市的話，可選擇與金價走勢掛鈎的ETF，如SPDR金ETF（02840），可能更直接。

古勝