Market Insight：息口敏感股壓力有增無減

事實上，美股年內表現在環球股市中獨佔鰲頭，道指爬過恒指頭成為昨日市場熱話。加上美國長短債孳息率皆急升，兩年及十年期國債孳息率分別升至2.89厘及3.22厘，揭示資金「棄債投股」意欲進一步增強。

留守股市要順勢而為

不過，美股強唔代表港股好！摩根大通近日發表報告，在中美貿易戰升級下，將明年中國經濟增長預測由6.2%下調至6.1%，並將中國股票評級從「增持」下調至「中性」。

分析師表示，美國關稅蠶食中國製造業利潤，壓抑投資和招聘，將導致收入減少並拖累消費。由此可見，中美貿易戰發展仍係困擾中港經濟的最大憂患。既然如此，惟有依賴「順勢而為」這投資金科玉律，若然港股繼續在下降通道內運行，毋須理會是升是跌，未破位前繼續在區間內炒上落！

投資股票，損手要止蝕起碼叫做容易，但樓宇買賣則是另一回事。港元同美元掛鈎，但香港銀行加息又跟唔足，資產價格如樓市卻被美國印鈔影響而大幅抽升，咁未來美國再加息，對香港樓市有乜影響其實唔難估計，事關供樓人士未來隨時要面對樓價下跌及供樓負擔上升的雙重夾擊。

基於股市向來畀樓市行得快半年至九個月，本地地產股已持續跑輸大市。古勝睇吓又計吓，一眾本地地產股、公用股、收息股甚至部分房地產信託基金（REITs）如領展（00823）及置富產業信託（00778）等，暫時或要放入雪櫃先。

石油板塊未完成調整

早前表現唔錯的石油股，一如所料要抖氣，即使紐約期油衝到上76美元樓上並創近四年高位，「三桶油」以至油服股近兩日一樣要跟隨大市調整，主因係有消息指俄羅斯同沙特阿拉伯會低調地增產，或為油價降溫，加上部分大行下調油股評級，所以都係等調整完成先再考慮。

古勝