曲奇餅與蝴蝶酥，估吓邊樣毛利率比較高？申請緊上市嘅曲奇四重奏本招股書就有答案喇，原來公司最賺到錢嘅唔係曲奇餅，而係蝴蝶酥！真係唔講唔知喎。
招股書顯示，蝴蝶酥毛利率達百分之七十一點一，比牛油曲奇高出一點五個百分點。點解？事關蝴蝶酥嘅主要材料酥皮嘅單位採購成本相對較低，加上生產蝴蝶酥只需要一點五至二點五小時，但整牛油曲奇就要成廿七至廿八個小時！
平時食一塊曲奇就需要幾秒，又點會諗到原來要整超過一日！何解牛油曲奇生產時間要比蝴蝶酥多成一倍？絲絲又睇番招股書，發現兩者生產流程唯一唔同地方，只係牛油曲奇比蝴蝶酥多一個步驟──「攪拌」。有冇人可以解畀絲絲知，到底咩要攪咁耐呢？
余絲韻