絲絲講場：亞馬遜貝索斯時薪3500萬

加薪將惠及逾25萬位全職與兼職員工，及超過10萬名季節性臨時工。今次新嘅公司最低時薪15美元，比美國法定嘅7.25美元高出超過一倍。

首富身家拋離蓋茨

聽講亞馬遜話為咗今次加薪，以後倉庫及時薪員工唔會再有每月花紅與股份獎賞。呢批員工每月少收幾百美元！不過公司話，成條數計，佢哋人工仍會多咗咁話喎。

另外，福布斯今年《美國400富豪榜》中，亞馬遜CEO貝索斯搶走咗微軟創辦人蓋茨九四年起坐咗廿四年嘅美國首富地位，仲做埋全球首富。

受亞馬遜股價勁升帶動，貝索斯身家過去一年瘋狂增加785億美元，現為1,602億美元，跑贏身家980億美元嘅蓋茨N條街。股神巴菲特就居第三位，身家889億美元。佢哋三位美國最有錢嘅，同時亦係全球最有錢嘅頭三位。

外媒即刻同貝索斯計計數，以佢一年「賺」到嘅收入，除番一年8,760小時，計出佢「時薪」447.4萬美元。

而拎緊亞馬遜最低工資嘅員工加薪後，就算當可以每日不眠不休做足24小時，都要捱34年，先追到老闆貝索斯一粒鐘嘅收入！

倒轉頭，各位一粒鐘嘅15美元汗水，貝索斯只係0.012秒就落袋！睇完條數，絲絲都有啲灰，嘆口氣，人家又袋成萬蚊喇！

余絲韻