絲絲講場:萬科喊要「活下去」 惹遐想

過去內地樓市興講「金九銀十」,皆因九月、十月係傳統收成日子,亦係賣樓嘅黃金檔期。不過內房股股價近排連番下挫,喺內地調控政策唔放鬆、仲不斷加強嘅情況下,今年已經無咩人再提呢個詞語,內房龍頭之一嘅萬科企業(02202)仲悲觀到嗌話要「活下去」!

目標6300億資金回籠

萬科上個月喺深圳總部開咗個秋季內部例會,竟然打正名號以「活下去」為主題,會場內隨處可見「活下去」三隻大字打上鮮紅色屏幕做背景,睇落都驚心動魄。

董事會主席郁亮喺會上話,萬科要以資金回籠為首要任務,喺行業面對轉捩點時生存下去係最終目標,仲話如果今年回款不足6,300億元人民幣,就代表萬科無資格做落去。

行業真係咁唔好景,連龍頭企業都覺得生存困難?唔好忘記,郁亮總向來未雨綢繆,早喺一四年就曾公開表示「樓市已經度過最黃金的歲月,進入白銀時代」,覺得內房唔再係「膽大為王」就可以賺錢咁話。

佢當時仲話會堅持理性投資策略,唔會買估值過於樂觀嘅地皮。但睇番資料,集團一五年全年新增加開發項目共105個,數量按年增加一倍有多!所以有人懷疑萬科會否又係出口術,借機搵多啲收購機會,更有人揶揄今次「活下去的萬科,在等着你活不下去」咁話。

嗱!行內皆知,郁亮本人好鍾意跑馬拉松,係長跑好手,會同大家打持久戰,是常識吧!

余絲韻