絲絲講場：搞離婚幾多身家最易反枱？

坐擁逾4千萬 可和平分手

話說，有美國調查顯示，家庭淨資產有100萬美元（約800萬港元），啲人先開始感覺到經濟安穩。咁樣雖然算係有錢，但離有錢到唔使憂，仲有一段距離。於是身家介乎100萬至500萬美元（約800萬至4,000萬港元）嘅中產，就成為「爭鬥階級」，無時無刻要爭更多嘅錢、爭上位、爭Keep住個社會階級身份等。

再講，唔似得啲極富階層含住銀匙出世、咩都有人代勞，中產下下都要自己赤手空拳打天下，可以話慣咗乜都爭一餐，所以離婚嘅時候亦唔例外。

專門幫人辦離婚嘅律師Randall Kessler經手唔少個案後，引證到呢條「4,000萬分水嶺」。佢話：「身家少過呢個數，下半世唔講得上無憂，個錢字仍睇得好重，所以愈會爭！」更有錢嗰啲，離婚時反而無咁計較。

唔想咁，可以點？簽定婚前協議書囉！再唔係，努力賺超過4,000萬身家囉！仲有個方法，就係畀心機去維繫雙方感情。邊樣易啲，你自己揀。

余絲韻