中美雙方一路談判但一路追加關稅，睇怕要有好消息都幾難。恒指昨日跌137點報27,790點，20天線得而復失，部分資金轉趨觀望，主板成交縮到落839億元。
正如古勝早前所言，美國總統「侵侵」今轉事先聲明話對經貿談判不寄厚望，相信中美經貿緊張形勢會持續。同時，從近月美股一枝獨秀的表現，市場亦已對貿戰誰勝誰負押咗注，相信資金仍傾向流入美股，而中港股市只會繼續唔精神，每次反彈都會係減持機會。
講過港股近期「彈散」特別多，周三教育股散完，昨日輪到手機設備股。舜宇光學（02382）份中期業績創咗○九年以來的最低增速，考慮到集團鏡頭出貨量有轉差迹象，加上受累人仔貶值，相信短期要重返紅底股有難度。
同業瑞聲科技（02018）成績表同樣失色，第二季度收入按年倒退14.5%至37.8億元人仔，純利則減少約38%至6.53億元人仔。雖然績後大行睇法各異，大摩表示瑞聲第二季純利較該行預期低30%，維持「增持」評級，目標價125元；野村則指集團次季盈利較市場預期差40%，維持其「中性」之投資評級，目標價下調至99.5元。查實都唔使睇大行分析，瑞聲在板塊氣氛轉差下自然要落，昨日跌4%，繼續中線尋底格局。
一直勸看官逢高減磅，昨日就有兩個好例子。易鑫集團（02858）公布中期業績虧損大幅收窄，股價一度飆升逾一成，惟尾市升幅收窄至8%。至於首隻同股不同權股份小米（01810），因上半年業績扭虧為盈，昨日高開7%，惟之後級級落，最終由升轉跌1.3%。
從兩隻有業績支持的股份表現可見，現時市場資金都係沽貨為主，再考慮到騰訊（00700）開始乏力，恒指亦從低位彈咗成千點，除非中美談判有好結果，否則後市再次向下機會唔細。
古勝