定啲嚟，此恒生不同彼恒生，打算改名嗰間係創業板上市公司「恒生控股」（08181），同恒生銀行（00011）無關係。不過今次易名就關恒生銀行事，事關呢間創板公司被恒生銀行告個名同商標侵權。
創板公司「恒生控股（Heng Sheng Holdings Limited）」周三出通告，建議易名為「時時服務（Shi Shi Services Limited）」。
今趟係呢間公司兩個幾月內第二次要改名。話說公司原叫「深港聯合物業管理（控股）」，二月時有間「恒生資本」做咗佢哋新控股股東，所以喺六月易名為「恒生控股」。
個新股東「恒生資本」係由黃黎明全資擁有，佢亦係山東「恒生地產」主席，主要喺淄博、濟南及青島從事地產開發同物業管理。總之，同大家識嘅恒生銀行無關係。
不過，恒生銀行擔心公眾會混淆，七月即出手入稟高等法院告間「恒生控股」同「恒生地產」侵權同假冒其知識產權，要求法院頒令禁止對方續用「恒生」字眼，逼對方改名，排咗期九月十三日聆訊。
間創板公司話，建議改名將於九月十七日開股東特別大會表決，等埋註冊地開曼群島公司註冊處批准，方可作實。
余絲韻