絲絲講場：最牛預測估再升近五成

蘋果公司（Apple Inc.）業績後股價猛漲，周四再升最多3.41%，收報207.39美元，升2.92%，市值達1.0017萬億美元，進身「萬億美元市值俱樂部」嘅首個美企成員，但市場更關注究竟係見頂信號，定仲有得升。Apple周五早段回吐，報205.48美元，跌0.92%。

著名股評人克拉默形容，Apple係史上最偉大嘅消費產品公司，多過係隻周期性工業股，仲話若以一隻高質消費股嘅約25倍市盈率計，目標價睇300美元，即較現水平再高近五成。

投資通訊Arora Report主編Nigam Arora亦話Apple值得有更高市盈率，相信Apple股價下一個里程碑係250美元。

事實上，即使Apple股價破頂，但估值未見瘋狂，十二個月預測市盈率只有15.7倍，未及標指嘅16.5倍，更遠低過科網泡沫時期嘅科技股估值，微軟、英特爾、思科系統及甲骨文○○年預測市盈率分別高達59、179倍、126倍及87倍。

不過長遠而言，市場擔心Apple未能開發另一熱賣產品。Gullane Capital Partners合夥人米勒就話Apple太依賴iPhone，憂慮嚟緊一兩年都未必出到新產品去取代。

余絲韻