絲絲講場：萬億美元市值神話：11年前唔買iPhone買股贏足9倍

就咁嘅，○七年出第一代iPhone時，有4GB容量與8GB容量版，售價分別係499美元及599美元，買晒兩部就盛惠1,098美元（約8,564港元）。如果當日用呢千幾美元投資Apple股票，批股票依家升值咗9倍去到約萬幾美元（約8萬幾港元），仲未計早幾年開始派咗嘅股息，咪話唔和味！

庫克：里程碑令人驕傲

Apple市值破萬億美元，CEO庫克話呢個里程碑令人驕傲，但唔係公司成功最重要嘅指標，話財政回報只係Apple創新同以產品及客戶為先嘅結果。

當年同Apple已故「教主」喬布斯一齊喺車房嵌機創辦呢間公司嘅舊拍檔沃茲尼亞克（Steve Wozniak）亦唔見得幾興奮，佢話「我當然以Apple為榮，不過我就唔會以咩整數呢啲人為嘅簡化去量度個世界，一間公司得就係得。」覺唔覺少少葡萄？關唔關佢八五年早就離開咗公司事呢可。

至於曾經將喬布斯踢走嘅Apple前行政總裁John Sculley就話，自己九三年離開公司後就賣咗大部分Apple股份，但6年前就重新買返，理由係喬布斯九七年回巢後開發咗一系列產品。不過Sculley臨尾兩句話，以往Apple用市場策略同方便易用嘅產品俘虜消費者，依家就係用財技去贏股東嘅歡心。夠晒一矢中的！

雖然話Apple依家市值比喬布斯一一年去世嗰陣多近兩倍，舵手庫克功不可沒，但已故教主打下嘅基礎冇人會否定，佢一手開發嘅iPhone，依然係Apple最大收入來源，○七年面世以來賣出咗超過13億部。

影響力唔及IBM及微軟

不過，亦有分析話，Apple喺美股嘅影響力，仍及唔上八五年嘅「藍色巨人」國際商業機器（IBM）同九九年嘅微軟，呢兩間公司當時佔美股市值分別達6.3%同4.9%，高過Apple依家嘅4.1%。

講開又講，到底1萬億美元即係幾多？若以國際貨幣基金組織數據顯示，呢個數差唔多係全球排第17位嘅印尼GDP（國內生產總值），亦即等於三個香港嘅GDP！

余絲韻