絲絲講場：母借8千元造就國產股神

講嘅係內地股壇傳奇人物林園，佢八九年以8,000蚊人民幣炒股起家，十幾年間炒出20億人仔資產，依家身家更加高不見頂。但當年起家嗰啲錢，原來係問阿媽借嘅，佢自己嗰時人工一個月得170蚊人民幣咋！

佢最近接受內媒邀請，講吓呢幾十年內地股壇變遷。佢其實係讀醫出身，八十年代喺深圳紅十字會醫院做，之後調到深圳博物館，工作同股市完全無關係。點開始掂股市？佢話當年有個朋友父母嘅公司上市，朋友話隻股賺硬，於是就開始留意股市，之後仲問阿媽借錢入市，怕且已攞盡當時全屋企嘅身家。

悔拒收iPhone 錯過Apple股票

佢人生第一隻股係深圳發展銀行，之後仲買咗萬科。當年交易所設備簡陋，大廳中間有塊黑板，上面寫住股票名同價，想沽幾多會寫喺黑板，有人買咗就抹走。林園就一手交錢一手交貨，佢話嗰時同街市買賣豬肉無分別。就係咁，佢第二年就賺咗12萬人仔，到○七年身家已達20幾億人仔。

佢話呢三十年投資生涯，最後悔係○八年有個美國女仔送部iPhone畀佢，話美國個個都用，仲示範手機睇股價有幾方便。可惜林園當時冇收到份禮物，結果錯過投資Apple Inc.嘅賺錢機會。佢話如果當年收咗部機，相信自己之後實會買Apple股票。

佢話個人炒股時代已結束，批評好多散戶冇做功課，一味靠估，以賭博心態去投資，唔蝕錢至奇。

余絲韻