絲絲講場：港金融監管高層大執位
金融監管及諮詢機構高層執位嘅「音樂椅」遊戲又開始！最新鮮滾熱辣應該係強制性公積金計劃管理局（積金局），因積金局「一姐」行政總監陳唐芷青今個月底就卸任，即仲有半個月，邊個會係接班人呢？據聞積金局營運總監羅盛梅接棒呼聲最高。
羅盛梅傳接棒積金局一姐
陳唐芷青係積金局老臣子，○○年就加入，○四年出任行政總監，呢個「一姐」位一坐就十四年，期間多次冧莊。今個月底「一姐」終退休。市傳今次接班人唔係空降，而係內部提升，現任機構事務總監鄭恩賜同羅盛梅都係接班人選，其中羅盛梅被睇高一線！
李律仁或出任金發局主席
另一個快有高層執位嘅機構就係香港金融發展局（金發局），事關金發局主席史美倫接掌香港交易所（00388）後，已表態話如政府搵到金發局主席合適人選，佢可提早讓位。市傳現任金發局成員、有史美倫「愛將」之稱嘅李律仁將接棒。
過多兩個幾月，香港證監會市場監察部執行董事雷祺光任期亦屆滿，絲絲聽聞佢已屆證監會退休年齡，但睇番現時證監會仍未公開招聘，市場估計雷祺光應該會「再坐一會」再續任。
講開又講，港交所集團監管事務總監兼上市主管戴林瀚與聯席集團營運總裁兼市場主管李國強，今年都夠港交所嘅退休年齡，不過兩人手頭上有大量工作計劃，加上港交所又正在積極籌備未來三年戰略大計，以及行政總裁李小加已經續約三年，估計小加呢兩名得力助手都唔會退休住！事實上，夠60歲退休年齡，唔代表就一定要離任，仍然可以按個別情況延長服務合約。
余絲韻