Market Insight：手機設備股再現鑊氣

不過，見到昨日大批熊仔被宰後，恒指都唔係幾回，可知短線好友仍佔上風，故即使再升多兩三百點想開淡倉，亦宜分注行事，且有心理準備要守一守，別心急諗住博一注獨贏！畢竟即使六月底半年結前有粉飾窗櫥因素，但亦不能忽視下周美國議息，月內債務到期高峰及市場流動性緊張的因素存在。利淡因素交織，暫不見得會出現一面倒的大升市。

港樓價與購買力脫節

蘋果公司股價創新高，加上中興通訊（00763）事件解決現曙光，帶動在港上市的手機設備股昨日做好，其中舜宇光學（02382）一度逼近52周高位（171.6元），全日高位見170.9元，收報168元，升4.8%，似乎破頂係指日可待。除了舜宇，就連走勢本已轉弱的瑞聲科技（02018）都發力，昨日尾市更急升，收報131.9元，升逾9%，乃四月中旬以來鮮見的升勢。睇走勢若然今轉突破136元，下一個較大的阻力位在148元。

政府放風話研徵新盤空置稅近尾聲，發展商當然係唔多Like，皆因啲貨成本唔平，冇得「唧牙膏」咁推啲推啲，唔會托得到高價賣樓。不過，始終香港樓價已同居民負擔能力嚴重脫節，而增加供應需時，古勝認為政府都有責任做番啲嘢，唔好睇住啲新盤價係咁升，帶住二手樓價上都當睇唔到。

至於有指樓市供應始終短缺，徵稅最終可能都係轉嫁買家，變相幫倒忙，所以唔應該徵收云云。呢個說法係假設了用家只可以買新盤，亦假設了樓價只升不跌，係咪合理，相信事實將會說明一切。

呢期大市向上，個別本地地產股都有異動，如信和置地（00083）由13元邊升上14.3元，昨日略為回吐約1%；恒基地產（00012）由45元水平升過上48元，昨日微調0.8%報46.55元。始終下周聯儲局議息，加息機會甚大，地產股屬息口敏感股，都係暫避為妙，若低位有揸到地產股，不妨趁本周市況氣氛高高興興減磅食胡，袋袋平安！

石藥躋身強者 安心坐

周初傳來三生製藥（01530）及金斯瑞生物科技（01548）配股集資，周二兩者均現回調，昨日三生製藥回穩，金斯瑞則再跌2.5%。不過，又毋須因此而定論醫藥股升勢已見頂，畢竟醫藥行業發展潛力巨大，至今配股活動亦只不過係一、兩間，未算好誇張，暫時可以短期調整看待。

石藥集團（01093）一向係在下愛股，股價唔經唔覺上到26元水平。由於集團的創新藥品增長潛力大，呢隻係難得的強勢股，除非有其他更高回報的目標可供選擇，否則持貨者可繼續安坐順風車。

古勝