絲絲講場：領飛溫兆華教書 碌盡人情卡
前任銀行家退下火線有咩做？現職領飛資本行政總裁溫兆華（Wilson）除咗做上市公司非執董，最花時間就係教書，五月就同學生分享點繼承家族生意。
Wilson一直都係香港中文大學財務學系客座教授，最近做埋校友事務委員會主席，上堂好生鬼，仲鍾意向老友「揼心口」，請唔同上市公司主席同私人銀行家，做嘉賓教埋一份。
香港近排唔少家族企業有傳承安排案例，Wilson就話係教書主題之一，尤其內地企業家開始面對兩大問題，分別就係發展同傳承，成為教書主題，而且搵埋私人銀行專家互相喺學生面前「切磋」，過程開心到Wilson滿面春風，好享受！
余絲韻