絲絲講場：喊爆發表「愛的宣言」 Tesla馬斯克准留任主席
特斯拉（Tesla）主席及行政總裁馬斯克可謂死裏逃生，剛獲留任主席，繼續獨攬大權。但分析指，股東錯過今年唯一一次股東大會可以罷免馬斯克嘅機會，有放生佢之嫌喎？
周二喺美國加州山景城舉行嘅特斯拉年度股東大會，可謂馬斯克由○四年開始掌控公司後面臨嘅最大挑戰，事關有維權股東認為，於馬斯克管理下，Model 3生產上屢遇挫折，又出現資金短缺，實在唔可以再畀佢一人擔任兩個重要職位，所以動議要求馬斯克唔再擔任主席。
好彩，股東否決重組董事局嘅議案，包括董事局由獨立董事擔任主席，以及中止Antonio Gracias、傑智梅鐸及Kimbal Musk繼續擔任獨立董事，因為三人關係被指同馬斯克太過密切。
不過，否決動議嘅理由就被指過於簡單，就係董事局認為家陣唔係轉舵手嘅適當時機，由馬斯克做主席，先可以快速就市場突變作出應變！
用愛造車 谷Model 3產量
無論點，死裏逃生嘅馬斯克對住一班股東，就好感性咁形容，「過去幾個月自己過得最痛苦同好似喺地獄咁」，並揚言到本月底，Model 3產量「極大可能」達到每周5,000輛，亦暗示明年目標將提升至每周1萬輛。
之後他更喊晒口同股東講：「Tesla係用愛嚟造汽車，反而好多公司係以市場營銷或財務部門為先，根本冇靈魂。雖然我哋嘅公司並唔完美，但我哋全心全意地投入造車！」
最後，馬斯克話最快下月公布中國設廠嘅詳情。
余絲韻