Market Insight：形勢混亂 嚴控注碼

周二晚華爾街笠笠亂，道指曾跌逾400點。期指結算日港股先嚟大冧檔，一度失守三萬關的恒指，最終跌427點報30,056點，跌市成交反而回升到1,097億元，反映近期基金買就細細注，沽就大大手的新玩法。

意國出事後果堪虞

今年股市最大的反高潮，都應該係周五正式入摩的A股，今年唔單止跑輸全球大部分主要股市，入摩前夕，昨日插落3,041點平咗今年個低位，肉酸到無以復加。想搵鬼佬托市結果事與願違，仲想奢望入摩炒起A股，北水又會落嚟托住港股，睇近排南下北水大為收斂，睇嚟六絕月個市都係無乜計。

意大利出事，皆因總統否決疑歐派人選擔任財長，阻止控制國會的民粹政黨組閣。如果短期總統無被彈劾，最快要到七、八月先會有重選，但目前疑歐派民意支持度過半，牌面上即使再選都係照贏。發展落去，IMF與歐盟都想意大利聽聽話話慳啲使，暗裏個算盤恐怕都想短期意大利愈亂愈妙，等到支持右翼思潮，反對繼續遵守歐盟財政約束的意大利民眾開始火燒到肉知痛，扶親歐盟陣營政黨重新執掌國會。

喺二○一一年，一個歐洲小國希臘賴債，搞到歐盟幾乎解體收場。作為歐洲第四大經濟體系，意大利殺傷力更大。公共債務排名全球第三，舊年破紀錄去到2.3萬億歐元，國債等於全國GDP的130%。假如希臘對歐盟是黃色炸藥，意大利絕對係核武級數，將成個歐盟炸爛。

今年環球股市無方向，牛皮悶局容易令人胡思亂想，往最壞方向猜度。周二晚開始有人估六月中聯儲局未必加到息，十年期美債孳息率插至2.76厘，與兩星期前高位3.1厘回落近一成一，反映唔止股市，債市一樣笠笠亂。

可考慮穩陣收息股

近排留意到積弱的垃圾債券，並無因為長息回順反彈，反映債商風險胃納依然吃緊，本地亦見愈來愈多中資公司發債計劃泡湯。歐洲愈亂、美金愈強，新興市場走資短期應該唔會逆轉，古勝實在睇唔通短期可以點收科！風高浪急下，惟有勸股民孖展可免則免，注碼控制在自己舒服水平（輸都唔會肉痛嗰隻）。

或者至多買吓極穩陣收息股，好似恒生銀行（00011）、中電（00002）、置富產託（00778）等吓運到，甚至疊埋心水放假，等世界盃開鑼，睇完一個月波或者思緒清晰番，到時世界或不再一樣。

古勝