絲絲講場：「殺人鯨」讚港企管治有圖謀？
沽空機構殺人鯨（Blue Orca Capital）投資總監Soren Aandahl尋日喺香港出席投資論壇，繼續插佢嘅最新獵物新秀麗（01910）。
正當大家揣測佢準備再向邊隻股份開刀之際，Soren就話今年暫時無新嘅港股目標，仲話大家覺得沽空機構狙擊港股，係因為香港上市公司普遍企業管治水平差，係一個誤會。其實香港企業管治水平相當好，咁先顯得差嗰啲真係差嘛！
但係今年唔再出手啫，唔代表手頭上無睇緊其他港股！呢層Soren點都唔肯講，但話香港依然係佢哋活躍嘅市場，會繼續投放30%資源喺港股嘅方針。
狙擊前用500粒鐘研究
據報新秀麗係佢狙擊過嘅香港上市公司當中市值最大嗰隻，停牌前市值逾383億元，咁日後會唔會持續「向高難度挑戰」，揀更加大嘅公司落手呢？Soren笑笑口話「我都想呀」，又話搵食有好多方法，唔使餐餐都話隻股票一文不值，重點係針對佢估值過高。
Soren又稱，今次狙擊新秀麗之前無同嗰邊管理層接觸過，但覺得投資者太過相信管理層和大行。佢透露，覓食時會特別留意財務總監同審計師辭職，同埋現金流曳嘅，落手前會用成500小時嘅長時間去研究。
話時話，鑿沉過咁多隻港股，驚唔驚會被監管機構對付先？Soren就話無有怕，認為香港一直尊重市場上嘅不同意見，保持市場活力。佢又歡迎香港交易所（00388）加快長期停牌公司除牌，話對市場發展係件好事，亦唔會影響佢哋搵食，事關佢哋可以喺場外沽空，有耐性就得喎。
余絲韻