天主教教宗方濟各下令梵蒂岡教廷周四發表一份聲明，警告金融市場上嘅衍生投資工具已變成「計時炸彈」，好快會爆炸，毒害市場健康。
聲明仲點名CDS（信貸違約掉期合約），自○七年金融危機於市場興起嘅CDS，市場規模已近乎等同全球GDP（國內生產總值），仲話「CDS這類合約毫無限制地擴散，鼓吹投機，在別人的失敗上進行賭博，從道德角度無法接受。」
CDS合約係乜？簡單講，可以當係買個保險嘅一種金融衍生工具。舉例，A公司向B銀行借錢，B銀行從中賺利息，但若A違約，咁B銀行可能連本都蝕埋；於是B銀行可以同C金融公司訂立CDS合約，B向C畀「保費」，萬一A違約，C公司保障B銀行嘅損失，若A正正常常向B還清貸款，咁C就賺咗B畀嘅「保費」。
CDS原意係用作避險，但整整吓變成炒「違約風險」，即係賭人幾時唔掂！結果今次畀梵蒂岡點埋名。
教宗方濟各過往亦批評過華爾街，仲呼籲要加強監管投機活動，阻止金融系統「極權」帶來更多危機。
余絲韻