絲絲講場：講AI激嬲員工 劉強東急補鑊

曾話有AI可削半數人

話說劉總上個月喺西班牙舉行嘅世界零售大會上講到，未來京東將會係間百分百由人工智能（AI）同機械人營運嘅無人公司，AI可以減少人類工時到一日只需做兩三個鐘，京東現時員工16萬，未來8萬就夠。

就係佢呢幾句，喺市場無敵發酵，被人話京東會裁走一半員工乜乜乜。唔知係咪已打擊到員工士氣，劉總早幾日天津出席第二屆世界智能大會演講時，急急澄清，話網傳佢要炒8萬人係「炒作」，「完全都是聳人聽聞，是不準確」喎。

劉總仲自動回帶，話自己當日嗰句意思係，若按京東目前規模，如果用AI的話，今日嘅工作大概只需8萬名員工就夠，而目前京東員工超過16萬名。

重點係下句，劉總仲話「但京東還在發展，未來還有10倍、20倍發展空間，所以京東仍需要人，我們永遠不會因技術迭代更新開除任何一個兄弟」。聽到老闆呢句定心丸，做細嘅係咪應該感動到喊呢可？但留意番，唔炒嘅係「兄弟」，喂佢有冇當你係佢「兄弟」先？

余絲韻