絲絲講場：威誠CEO分享馬達加斯加「驚」歷

為茄士咩見識冇門車

事緣日前遇到本地服裝供應鏈商威誠國際（08107）CEO高文灝（Morris），佢同絲絲分享咗喺馬達加斯加嘅見聞。因乜事要飛到非洲咁遠？因為公司喺當地有供應商，所以Morris經常要過去監督生產。

當地人手生產茄士咩廿年前已經出晒名，加上勞動力高、人工成本較低，連要求高嘅歐洲人都鍾意。Morris仲話，島國運輸方便，而且當地享有歐洲免關稅，所以係中國、柬埔寨以外不可或缺嘅生產地。

威誠喺當地生產過最貴嘅全人手針織羊絨衫，出廠價每件成千蚊港紙，如果喺百貨公司，仲可以賣到成500歐羅！不過Morris話全人手逐針逐針織真係好花工夫，每年都係出產到一、兩款，所以物以罕為貴。

香港飛馬達加斯加，淨係搭飛機都可能要用超過一日半嘅時間。Morris話，喺當地冇睇過動物，不過就見過冇門嘅私家車周街行駛。由於曾經係法國殖民地，所以當地法國菜好正宗，仲話有道名菜叫「天瑞」，即係烏龜，唔知大家又敢唔敢食？

余絲韻