繼中興通訊（00763）後，輪到華為畀美國司法部開「快勞」調查，港股在期指結算前氣氛進一步轉差，昨日曾失守三萬點關。還有兩日先至到「五窮月」，大市個勢似落多過上，股民睇路喇！
周三道指終止五連跌，惟中美貿易戰及美國十年期國債孳息率升至3.03厘今浪新高，港股昨日曾失守三萬點，低見29,871點，埋單跌320點報30,007點。港股通拉咗閘，無北水下成交反而增至1,080億元，可見即市沽壓沉重。
港股成也騰訊（00700）、敗也騰訊，昨日股王低見377.2元，同一月高位比較啱啱跌夠兩成。無疑掛牌十四年期間，股王升多跌少，高位調整兩成都唔係未試過，睇番一五年同一六年股價均試過由高位調整26.9%及18.7%。
但今時唔同往日，騰訊貴為最大隻的港股，市值達3.6萬億元，港股基金食粥食飯都睇佢。強勢時，Overweight佢持貨高於指數比重，可以輕鬆交到功課，跑贏回報基準。
依家恒指先將今年升幅泡湯，騰訊已率先由升轉跌，累瀉5.8%，基金要繼續交出比指數理想表現，焗住要減佢。諗住跌兩成去撈？常言道咪空手接跌下來的刀，即使唔啱聽，卻無疑係股海要長玩長有，必須緊記的金科玉律。
風高浪急，資金流入內地電力及新能源股避險，金風科技（02208）首季盈利按年增長三成二，刺激昨日股價升6.4%。收市後龍源電力（00916）出季績，盈利19.01億元人仔，按年升67%，首季棄風率大降8.8個百分點至7.49%，表現確實好過行業平均數唔少，難怪近排多咗大行唱好佢。
龍源昨日升2.5%收報6.96元，10倍PE唔夠，只要破到一六年高位7.2元，上面大把世界。若今日開得唔太過分，即使7元高些少都仲追得過。
古勝