絲絲講場：普爾遜賭博式投資望翻身

美國監管文件最近顯示，普爾遜間投資管理公司Paulson & Co.原來舊年同三間First-Loss類基金主要供應商簽約合作，畀人話佢已經陷入賭徒模式。

以小博大 隨時輸晒

呢類First-Loss基金（簡稱FIRLO）玩法係，好似普爾遜咁嘅基金經理會同投資者一齊注錢入基金，基金經理每出一份錢，對方就出九份。若賺到錢，基金經理可以分取利潤嘅55%，相比一般基金經理平時分紅22%左右，足足收多一倍！不過若蝕嘅話，就先蝕基金經理嗰份先，當蝕光晒基金經理份本時，投資者仲可以贖回基金唔玩，拎番個本走人。

咁另類嘅FIRLO，通常係啲難吸大型投資者嘅細基金經理同初創企業先搞。老手如普爾遜都咁博？無他嘅，佢近年連串投資失利，唔少投資者贖回基金走人，佢老人家管理資產規模由一一年高峰期嘅380億美元，大縮至現約90億美元，足足縮水76%！

試問唔出到「死就我死先」做代價，又點可以齋出一蚊就吸到九蚊返嚟，去倍大番個基金池畀你舞？十倍槓桿，仲要冒住分分鐘連老本渣都冇嘅險，擺明賭仔心態－「有賭未為輸」。

余絲韻