絲絲講場：高盛一姐職場突圍方程式
雖則年代變，但金融圈仍然大多數係睇男人頭，女士想突圍唔容易。高盛投資銀行部全球工業一姐Clare Scherrer向姊妹們傳授職場突圍法，以親身經歷，示範點喺15分鐘內扭轉一位傳統意大利男嘅睇法。
佢話：「我哋（女士）時常畀人當成書嘅封面，單憑封面就判斷內涵，直至佢哋閱讀為止。」
盡早面向客戶 勇於表達
Scherrer教路唔好嘥時間，尤其係年輕職場女性，應盡早面向客戶，勇於表達想法，令對方除去任何固有觀念。
佢就分享一個經歷，「有次我要去見位新客，對方係間企業嘅行政總裁，係位意大利人。飛機一降落，同行嘅同事就接到嗰位客人電話，對方劈頭埋怨『你冇話我知，同我見面嘅係一位女士！』」
嗰位客人因冇為會面而喺高級餐廳訂位覺得唔自在，事關佢認為作為一間企業嘅男CEO，要以「紳士風度」款待女士。
Scherrer最後同對方喺咖啡廳會面，一見面佢就講明自己嘅價值觀，「客人15分鐘內已經忘記我係女人，專注番喺會面內容。」
Scherrer經驗顯示，性別其實唔重要，佢話「書本最重要嘅係『內容』。」佢仲建議年輕職場女性要爭取多啲機會與客戶溝通，愈能為客戶提供建議同解決方案，效果愈好。呢個就係女士成功嘅方程式。
余絲韻