絲絲講場：朗廷CEO炒股悟道「貸」識計
朗廷酒店（01270）行政總裁（CEO）葉毓強以自己投資美股經驗，應用於公司借貸管理上，簡單講就係五個字─點都留一手。
佢話，自己多年前做投資銀行時買過一隻美股，入市價每股15美元，後來呢隻股份升到每股95美元，隻股就係微軟（Microsoft）。
「贏錢要先獲利一半」
升咗成六倍幾，索性沽晒賺盡佢？No喎，葉毓強話，呢個世界從來無人知會點，所以佢只先行沽一半獲利。佢話呢種贏錢先獲利一半做法，就好似買保險咁，佢亦將呢個經驗應用喺公司借貸管理上。
話說朗廷去年將68億元借貸額嘅一半多啲，分五次由浮息借貸轉成為定息借貸，以降低未來加息風險，依家集團浮息同埋定息利率都係大約1.5厘。葉毓強話，目前倫敦銀行同業拆息（Libor）與香港銀行同業拆息（Hibor）嘅息差達0.75至1厘，估計美國會再加多三次息，每次加0.25厘，未來香港利率應該一定會升。「但就算升到三厘以上，我哋都有一半債做咗『保險』」。
咁依家，葉毓強仲會唔會買科技股呢？佢就話，依家打工唔咁搏，有錢都買債券，仲要係「AA」評級嘅優質債券。睇嚟佢理財哲學絕對屬於穩陣派。
余絲韻