Market Insight：水泥建材股強得有理

港股昨日先跌後回升，騰訊控股（00700）配股價405元失而復得，似乎短期係要嘗試營造出一個底部。不過，見午後股價一度倒升上412.4元，惜最終還是低收作結，收報409.4元，跌0.05%，似乎好淡勢力相當，現時且別急於為短期底部下定論。

騰訊後市持續波動

老實講，內地要科網巨企回歸A股的話，騰訊肯定會係首批之列，內地投資者對騰訊的了解亦更貼身，相信A股擴容對市況影響有限，反而內地市場可給予騰訊更高的估值。古勝對騰訊長期展望樂觀看法未變，只是短期由美股跌勢及美國科技股利淡消息所帶來的動盪仍不能排除，且如今大環境唔多就，若未有貨在手，求穩至上的心態可以理解。

呢一刻入場炒波幅，最好即日鮮兼嚴限注碼，無謂過夜提心吊膽；想趁大風大浪撈貨的話，要有做長線投資的心理準備，自問要承受得起一成以上的波幅，否則最好忍一忍手。

說到底，第二季除咗中美兩方在貿易問題上角力之外，大家都要留意吓，二月以來LIBOR（美元）拆息持續上升，除了顯示平息不再，市場流動性起根本變化之外，對於企業和投資者的借貸成本會有負面影響，遲早會反映在經濟環節。所以，市況風險正在累積確是不爭的事實，投資者亦別太過老定，及時檢討吓財務狀況同投資組合，做好風險管理，始能立於不敗之地。

回說昨日市況，雖然下跌股份逾千隻，但都有唔少中資股可以迎難而上。好似隻中石化（00386）股價創出52周高7.17元；水泥建材股如海螺水泥（00914）、中材股份（01893）及中國建材（03323）亦同創出52周新高，皆因三月以來內地水泥價格向上，在庫存不高，以及大型基建動工下，相信今年水泥價格可維持在高位運行，故見板塊表現可以反地心吸力，短線有望保持強勢。

蒙牛宜逢回吐收集

此外，見到內需股都有啲睇頭，隻蒙牛乳業（02319）股價先落過26.25元，再抽番上高位見28.5元，創52周新高，且成交幾像樣。

事實上，蒙牛主要做內地生意，打貿易戰對內地乳品消費行情影響唔大，再加上自泊得中糧大碼頭後，蒙牛努力做好品牌，去年盈利、毛利均及派息有所增長，基本因素改善，績後引發資金重估係合情合理的發展。既為內地乳品一大品牌，業績又重納正軌，相信中線股價有力升上30元樓上，可逢回吐留意收集機會。

古勝