絲絲講場：Spotify顧問費生意大 高盛二佬為4億露真身
串流音樂平台Spotify周二喺紐交所上市，全球矚目，今次佢哋採用直接上市模式，完全打破傳統，冇包銷商，亦冇設定招股價。
初步數據顯示，Spotify開價介乎150至160美元，明顯高過紐交所給予嘅上市參考價132美元。
今次Spotify上市連包銷商都慳番，啲大行咪冇生意做？就咁嘅，Spotify仍會掟5,000萬美元（約3.9億港元）請大行做顧問嘅。
兼職DJ 夜場打碟
為搶呢5,000萬美元，啲行可以去到幾盡？高盛位營運總監（COO）David Solomon向Spotify爭取生意時，不惜撻埋自己第二個身份出來──電音DJ！
呢位今年已56歲嘅Solomon喺華爾街嘅身份就係高盛第二把交椅，兼係高盛主席兼行政總裁布蘭克費恩嘅繼任人大熱。不過佢喺電子跳舞音樂界有另一個身份，就係著名嘅DJ D-Sol，專喺夜場同音樂節打碟！
為爭生意連自己秘撈都爆埋出來，可見搵食艱難。無他嘅，若然今趟Spotify上市唔使搵大行「維持秩序」都一樣掂，其他公司肯定有樣學樣，華爾街大行日後睇怕無啖好食！
Spotify上市唔單止冇設定招股價、冇預設股份供應、冇包銷商，除騰訊（00700）同旗下騰訊音樂娛樂外，現有投資者亦不設禁售期。
話時話，騰訊已揸住Spotify 7.5%股份。按騰訊以往作風，佢哋睇好嘅嘢，一向點只揸唔夠一成股份，你估吓騰訊會唔會再喺市場撈Spotify呢可？
余絲韻