絲絲講場：單身住公屋130萬唔夠退休

計埋通脹 至少預四球

以為好輕鬆？睇埋落去先啦，報告話計埋通脹等因素，未來價值最少要係400萬元！

以現時30歲、月賺16,800元嘅打工仔為例，退休年齡為65歲。要維持基本生活，喺量入為出嘅情況之下，仲假設有公屋住，每月最低預算係6,640元，要130萬元儲蓄。若以二人生活，就可以慳少少，每月預算開支為11,220元。

有樓揸手 想豐盛要2240萬

若打算退休後享受更豐盛生活，六千幾蚊就更係唔夠啦！如果諗住退休時仲可以出外去吓旅行，假設你已有層私人樓住，仲要已經還清晒按揭，咁每人每月所需預算為37,475元，總退休儲備就要去到730萬元。但若計埋通脹等因素，未來價值最少要有2,240萬元！若係將來仲要租私人樓住，咁就唔該額外預留更多資金。

滙豐香港退休金主管葉士奇話，打工仔應制訂適合自己嘅退休生活方式，究竟將來打算過啲「量入為出」定係想「享受豐盛」啲？諗定之後，就要按計劃訂立儲蓄目標。佢仲話，強積金係退休儲蓄嘅一部分，千祈唔好忽視戶口入面嘅錢，應定期檢視自己嘅強積金戶口。

余絲韻