Market Insight：藍籌業績隨時見光死

美國利率期貨顯示，今年底美國最後一次議息，聯邦基金利率比目前再加三個骨（0.75厘的機會率有37.6%，其次係加四次的25.5%及兩次的23%。其實同佢講話前，只係有1至2%變化。不過，近排十年期美國國債孳息向3厘大關愈行愈近，股債市大孖沙條神經好似橡皮圈咁拉到就嚟拉斷，言詞之間鷹味只係些微比倫媽濃啲啲，大家都搵嘢嚟掟，周二晚道指跌299點，將周一的升幅跌番大半出街。

大媽行動不似預期

美股唔掂，加埋未開市中國出二月官方製造業採購經理指數（PMI），差過預期落到50.3，都知個市難逃一跌。不過，過去兩日恒指弱過藥煲，更重要係人人以為A股重開，北水會落嚟射住射住，誰不知大媽們唔買不特止仲踩多腳，一連兩日淨流出，之前趁成交疏落挾淡炒上去，以為等人接火棒，結果偷雞唔到蝕把米。

昨日恒指彈都唔彈，一口氣穿晒三條平均線，最終跌423點收報30,844點，論走勢肉酸到震。值得留意的是，周二恒指高位掂一掂31,798點便開始插水，啱啱壓喺33,484至29,129點跌浪的0.618反彈阻力31,820點樓下，過去兩日跌得急，短線有反彈唔奇，惟長遠返唔到呢個位，唔使旨意後市可以返到年初的33,000點以上高位。

外圍息口未明朗，中國經濟增長在去槓桿下，今年好有可能不及往年。一七年勢如破竹的港股，今年出閘脫腳，現時大家最想知的是，投資者對上市公司業績的預期，是否仍然過於樂觀。睇滙豐控股（00005）派成績表後股價即見光死，對未來一個月陸續派成績表的藍籌股，無疑是響起了警號。

港交所（00388）去年全年賺74.04億元，按年升28.3%，每股盈利6.03元，末期息派2.85元，連中期股息全年派息共5.4元，增幅27%稍不及盈利增長，基本業績是符合市場預期的平均數字。

港交所估值已偏貴

不過，去年底港股成交持續向上，加上今年下半年向同股不同權及缺乏盈利基礎的生物科技企業上市開綠燈，過去一季多間大行都重估一八年股市日均成交額，令港交所估值水漲船高。回顧十年其平均及中位數估值大約在32至33倍水平，昨日收市價計，往績市盈率47倍，足足有四成四溢價。

由於大量刺激股市交投的催化劑，早在港交所估值上反映，雖然各方祝福，同股不同權睇怕無論如何都會落實，但如果交投在去年第四季的1,073億元日均成交基礎上只多出兩至三成，都只係合理但唔算平。更何況近排跌市成交大，升市成交即縮，十足十大戶減磅格局，近排股價反彈未到300元已經回頭，唔係無道理。

古勝